Yazıçılar və şairlər

       Rəfibəyli Nigar Xudadat qızı - azərbaycanlı şairə, tərcüməçi, 1934-cü ildən Azərbaycan Yazıçılar Birliyinin üzvü, Azərbaycanın Əməkdar mədəniyyət işçisi (1967), Azərbaycanın Xalq şairəsi (1981).

         Həyatı

    Nigar Rəfibəyli 1913-cü il iyunun 23-də Gəncə şəhərində anadan olmuşdur. Bakı Pedaqoji Texnikumunu bitirmişdir (1930). Moskvada Pedaqoji İnstitutda təhsilini davam etdirmişdir (1932-1936). Bakı kinostudiyasında ssenari şöbəsində, eyni zamanda fəhlə-gənclər məktəbində (1930-1932), Azərnəşrdə bədii-ədəbiyyat şöbəsində tərcüməçi və redaktor, Uşaqgəncnəşrdə bədii ədəbiyyat şöbəsində redaktor (1937-1939) vəzifələrində işləmişdir. Xidmətlərinə görə "Şərəf" nişanı, orden və medallarla təltif olunmuşdur.

       "Çadra" adlı ilk şeri 1928-ci ildə "Dan ulduzu" jurnalında dərc edilmişdir. 1934-cü ildə nəşr olunmuş ilk "Şerlər" kitabı Azərbaycan qadınlarının yeni həyat quruculuğunda iştirakından bəhs edir. "Dolores İbarruri" (1936) şeri ispan xalqının faşizmə qarşı qəhrəmanlıq mübarizəsinə həsr olunmuşdur. "Cəmilə" şeri Əlcəzair xalqının milli azadlıq mübarizəsinə həsr olunmuş qüvvətli lirik əsərlərdəndir.

     Məhsəti Gəncəvinin rübailərini, Evripidin "İfigeniya", Fridrix Şillerin "Məkr və məhəbbət", Anton Çexovun "Vanya dayı", "Albalı bağı" dramalarını, E.L.Voyniçin "Ovod", O.Qonçarın "Bayraqdarlar" romanlarını, Əlişir Nəvai, Aleksandr Puşkin, Mixail Lermontov, Taras Şevçenko, Ş.Petöfi, A.Mitskeviç, A.Sereteli və başqalarının əsərlərini tərcümə etmişdir. Əsərləri xarici dillərə tərcümə olunmuşdur. 1981-ci ildə Bakı şəhərində vəfat etmişdir. Məzarı II Fəxri Xiyabandadır.

• Azərbaycan SSR Ali Sovetinin Fəxri Fərmanı — 28.06.1973^[1]
• "Şərəf Nişanı" ordeni
• Azərbaycan Yazıçılar Birliyinin üzvü— 1934
• Əməkdar Mədəniyyət işçisi — 1967
• Azərbaycan Respublikasının Xalq şairəsi - 1981

      Təbiət mənzərələri, mənəvi zənginlik, vətənpərvərlik, sülh, demokratiya, azadlıq ideyaları tərənnüm olunan kitabları

• Şerlər (1934)
• Dənizin səsi gəlir (1964)
• İşıqlı dünyam (1969)
• Günəşdən gənclik istədim (1974)
• Həzin bir axşamda düşsən yadıma (1982)
• Şanlı nəsillərin yadigarısan (1982)

       Müharibə movzusuna və müharibə əleyhinə həsr olunan kitabları

• Zəfər nəğməsi (1943)
• Şerlər (1949)
• Anaların səsi (1951)
• Yol xatirələri, Avropa ətrafında səyahət gündəliyindən (1957)

       Uşaqlar üçün yazdığı kitablar

• Balaca qəhrəman (1942)
• Günəşin cavabı (1966)
• Məstanın balaları (1968)
• Bizə bahar yaraşır (1978)

       Şeirlərinə yazılmış mahnılar

• Şövkət Ələkbərova - Güllər - musiqi: Emin Sabitoğlu
• Akif İslamzadə - Ala gözlüm - musiqi: Emin Sabitoğlu
• Zeynəb Xanlarova - Dağları duman alanda - musiqi: Emin Sabitoğlu
• Xədicə Abbasova - Aman ayrılıq - musiqi: Emin Sabitoğlu